Рускиот министер за телекомуникации Николај Никифоров потврди дека владините претставници на Руската Федерација престанале да ги користат нивните таблети iPad и ги замениле со таблети Samsung. Причината за тоа се безбедносните грижи, кои се манифестираа особено откако се појави информацијата дека американската безбедносна агенција NSA ги следи комуникациите на различни уреди, вклучително и оние од Apple. Затоа, руската влада склучи договор со Samsung и почна да користи специјални таблети кои беа целосно прилагодени за владиниот сектор и обезбедуваат највисоко ниво на безбедност.
Во исто време, Никифоров ги отфрли сите шпекулации дека руската влада престанала да ја користи американската технологија како одговор на западните санкции поради нејзината анексија на полуостровот Крим. Сепак, ова не е првпат владата да почне да користи уреди од Samsung. Веќе минатата недела The Wall Street Journal објави тврдење дека технолошкиот тим на Белата куќа тестира специјално модифицирани телефони од Samsung и LG кои сегашниот американски претседател Барак Обама би можел да почне да ги користи наместо телефон BlackBerry.
*Извор: Гардијан
